O concello de Lugo xunto coa Asociación Bonhomía e a Asociación Penitenciaria Concepción Arenal pon en marcha a iniciativa ‘Se busca’, que ten como obxectivo facilitar a inclusión e sensibilizar á poboación sobre as dificultades que atopan as persoas que estiveron en centros penitenciarios tras a súa liberación.
O proxecto consiste en colocar dous carteis de Se Busca, protagonizados por unha muller e un home, que buscan emprego á saída do centro penitenciario. Numerosas empresas de Galicia están colaborando na difusión desta campaña mediante a colocación dos carteis nos escaparates.
No acto de presentación da iniciativa, a concelleira de Benestar Social, Ana González Abelleira; enxalzou este proxecto, que avoga pola creación de vínculos sociais para contribuír ao proceso de volta á sociedade destas persoas que cumpriron penas de prisión. “Queremos axudar a atoparse a todos aqueles que se buscan”, subliñou a edil.
