A Asociación de Veciños do Centro de Lugo presentou alegacións á ordenanza da Zona de Baixas Emisións (ZBE) tras analizar o seu contido nunha reunión veciñal. O colectivo considera que algunhas das medidas previstas poden resultar prexudiciais para a mobilidade e a seguridade na zona centro da cidade.
Entre as principais cuestións sinaladas, a asociación amosa a súa preocupación pola posibilidade de que os vehículos de mobilidade persoal (VMP) poidan circular sen restricións, tal e como recolle a ordenanza. Segundo indican, esta situación podería xerar problemas de convivencia e seguridade viaria, ademais de entrar en contradición coa normativa estatal de tráfico. Por este motivo, propoñen que estes vehículos estean obrigados a seguir os mesmos itinerarios establecidos para o resto do tráfico, co obxectivo de garantir unha circulación máis ordenada.
No documento de alegacións tamén se recolle a necesidade de reforzar o control da contaminación acústica dentro da ZBE. Neste punto, fan especial fincapé na contorna da Catedral de Lugo, un espazo de carácter residencial que, segundo os veciños, presenta unha situación especialmente deteriorada neste aspecto. Ademais, subliñan o valor patrimonial desta zona, na que conflúen tres recoñecementos da UNESCO: a Catedral, a Muralla de Lugo e o Camiño de Santiago, polo que consideran prioritario establecer medidas específicas de protección.
Por outra banda, a asociación trasladou tamén ao Concello propostas relativas ao novo contrato do servizo de transporte urbano. Entre elas, destaca a aposta por vehículos eléctricos e de pequeno tamaño para operar no centro histórico, en consonancia cos obxectivos ambientais da ZBE. Así mesmo, propoñen a creación dunha zona lanzadeira na Ronda da Muralla que permita realizar transbordos desde autobuses de maior capacidade a outros máis pequenos e sostibles, que circularían polo centro con maior frecuencia.
A asociación conclúe reafirmando o seu compromiso coa mellora da mobilidade, a protección do patrimonio e o benestar da veciñanza, defendendo un modelo de cidade máis sostible, ordenado e respectuoso co seu valor histórico.
