Ás 12 do mediodía tiveron lugar en Lugo tres concentracións simultáneas en tres puntos diferentes da cidade en solidariedade cos dous axentes do Corpo Nacional de Policía asasinados no atentado terrorista á Embaixada de España na cidade afgá de Kabul.
A corporación de Lugo xuntouse diante do Concello, persoal da delegación da Xunta ante os edificios administrativos e representantes da subdelegación do Goberno fronte á súa sede.
Nos tres casos as persoas asistentes gardaron un minuto de silencio co que quixeron transmitir as súas condolencias e apoio ás familias das vítimas así como amosar o seu rexeitamento ao ataque terrorista. Acudiron aos respectivos actos simbólicos a alcaldesa da cidade, Lara Méndez, a delegada da Xunta, Raquel Arias, o subdelegado Ramón Carballo, o presidente provincial do PP e senador, José Manuel Barreiro ou o deputado popular Joaquín García Díez, entre outras autoridades.
